قصيدة يايمه

يالملكه ماك متزعمه
ياساريه في الزمن النحل
ياضل على البلدات رمى
يالكادحه من أجل الوليد
شان راسه إصبح في السما

يالفوقاماف غير الله شي
حتى الله ذاتو معظما
والجنة إيه تصبح معاك
أرخص وأقل من مقدما
دايساهابين كرعيك حبت
في قاع مدايسك مرغمه

ويايمه شوق قطع حشاي
وا وجعة الدمع الهما
إشتقت لي مطر الخريف
وكتين حفايرو يحزما
وبهيمنا فر تال التبر
أماتو واردات الضما

كوعت فوق العنقريب
بتشرف العيش اللتيب
والعفرا تتقاطا الرحل
منظر دواخلي يأزما
مرصوص متل عقدالكنار
منضوم علي جيد السما

إتحكرتي فوق بنبرحطب
قهوة ضحا وجلسةلما
خيلاني وأعمامي الكبار
خالاتي والجد العمى
ونسه وصراحة وقرقراب
متفاءلة بي الضل الرما

والتايه بت عوض الكريم
المالكه قلبي مقسما
منصرةفي طرف الصريف
نادتني هي أصبحتوكيف؟
بيناتنا شاشاق الحطب
همسا دقاق مو همهمه

قالولكن أبقو علي الفطور
الليله أمي مكرمه
طرزت ماراعيت كبير
آالتايه كيف انشاءالله خير
قاتلي شديدة وإلا عيب
وسط الرجال بتناغما

تب قبلت ماشفت غيركفنا
رطن كاجرالطريحةمحشما
إلا إمي وا ضيعة رجاك
من ولدك الطشطش عما
أنداح تبع زخم المدن
ضيع بداوتو وحطما
وسلام من البلدالسجم
سموها يمه العاصمه

ويايمه ولدك ضاع خلاص
تايه مباري العولمة
ما ياهو ضرغام الرجال
الكان قبيلتو معظما
وياحليلو روبك والسمن
يا حليل لذايذ الأطعمة

ضوق لساني طعم جديد
بيرقر وجامبو المفرمة
ومعدتي ذاتا إتطوطوت
مااظن عصيدتك تهضما
خدعتني كندشة الوهم
حمام وريحة وهندمه

راجياني فوق النارأقع؟؟
وأناها الشمس مابلزما!!
دايراني فوق دلوكه أهز؟
راجياني أسل سيفي وأرز
وألعب مع التوم ود حمد
صقريه درقه محكمه!!

أنا داب بقيت سيدالرقيص
مرات كتيفتي أبرما
دايراني بي سوط العنج
أركز مع السر وآدما؟
إن فر سروالي البجر
أربط بطينتي وأحزما

شبال من التايه وأهز
طاقيتي أشنقا وأبرما
فوق ضهري داداب العنج
وأصفاحي نازفات الدما
آيمه ولدك ضاع زمان
وحكايتو بقيت مؤلمه

باريت لؤي وقصي ومي
وين تاني كاكوم وآدما !!
ضهري الممسح بتلصف
راقد لحايفو منعمه
ما اظنو بتحمل لبع
والخرشه ما أظن يلزما

سروالي ماياهو القبيل
سديريتي جكه مجضمه
حاجات مجبصه كلها
وطاقيتي كاوكوي إنما

الكاوي قلبي وشاوي شي
كان شفتي واحدةمقرضمه
لابسه البناطلين زينا
والله ما تفرزيها تب
كان فاقده شنبا تبرما

لاكنو مهما الزول بعد
حكايتو القبيل ما بهدما
جاييك وشايل بقجتي
جواها ورقه مختمه

إياهو حلمك وجبتو ليك
داك جف ريقي من الظما
بتمنى من الله الكريم
إمد أيامك إقدما
وتحجي في كل عام إهل
وتعودي سالمة وغانمة.
‎ ‎

شكرا جزيلا والتحايا لكل الامهات
فهي كلمات بسيطة الا انها كبيرة في المعني