شعر بعنوان ي زول تعال

يا زول تعال
إنت القمر شايفك بعيد حيرتَ روحي و لوعتي
لمن أبيت تنزل قريب شديت عليك أنا رحلتي
زادي الأمل وأحلامي بيك يارب تكون من قسمتي
يا زول تعال
أرميني في بحر الغرام شَرِّق مغارب دنيتي
لقياك أخير لو بالغرق من شوق يحرق منيتي
اقلب موازين القدر خليها تعكس سكتي
يا زول تعال
أنساك محال طاريك دوام ما بيك سعادي و بهجتي
دا عبير هواك طيبة نداك زَانن ملامح زهرتي
ساقيني لى سحر الحروف شِبْعَت منابع فكرتي
يا زول تعال
متين تعود أهديك عيون من طيب كلامي و بسمتي
وأفرش مداك بالحب دوام وانسج هَنَاك من غنوتي
ارمي الحزن بمقدمك كان بيك تصيب يوم رميتي
يا زول تعال
تعال و بكل ألوان الفرح و شيِّد معالم رسمتي
فيك الجمال أطرب دماي دوزن مقاطع سجعتي
وأشيل هواك جوا القليب و أدفن منابع دمعتي
يا زول تعال
من دونك ينساني الفرح و تطول مواجع سهرتي
كمل معاي رحلة عمر طالت عليك أنا سجدتي
أسكن معاي بيت الوصال وتضوق حنينك غربتي
يا زول تعال